По денешната вонредна седница на Владата ќе биде појасно дали следува пад на цените на горивата

На денешната вонредна седница Владата ќе ги разгледува мерките поврзани со нафтените деривати, а според најавите на премиерот Христијан Мицкоски, се очекува намалување на цената на дизел-горивото и стабилизирање на состојбите на домашниот пазар.

— реклама —

Мицкоски изјави дека владините анализи, базирани на движењата на светските берзи во текот на втората половина на мај и изминатата недела, покажуваат услови за постепено смирување на цените.

— реклама —

– Очекуваме полека, но сигурно да се стабилизираат цените и кај нас. Повластената стапка на ДДВ за бензините од 10 проценти ќе се врати на 18 проценти, додека намалувањето на акцизата од два денари по литар ќе остане во сила за дизелот и безоловните бензини од 95 и 98 октани – изјави премиерот.

Тој посочи дека Владата води разговори со Окта за можен дополнителен попуст во првата половина од јуни.

— реклама —

Според владините пресметки, бензините би можеле да останат на сегашното ниво или да поскапат минимално, додека дизелот би поевтинил за околу шест до шест и пол денари по литар.

Новите цени на горивата треба да бидат познати утре, кога Регулаторната комисија за енергетика ќе ја донесе редовната одлука за малопродажните цени на нафтените деривати.