По објавувањето на рамковниот договор за ставање крај на конфликтот меѓу САД и Иран, пристигнуваат првите конкретни знаци за смирување на состојбата на теренот.
Американскиот претседател Доналд Трамп соопшти дека бродовите повторно почнале да се движат низ Ормускиот теснец, еден од најважните светски поморски премини за транспорт на нафта и течен природен гас.
Иако засега нема драстично зголемување на поморскиот сообраќај, анализата на BBC Verify покажува дека сè поголем број пловила се обидуваат да минат низ стратешкиот теснец.
Дополнително олеснување донесе и изјавата на американскиот потпретседател Џеј Ди Венс, кој потврди дека компаниите, барем во почетната фаза, нема да плаќаат спорни надоместоци на Иран за пловидба низ Ормускиот теснец.
Во меѓувреме, иранското Министерство за надворешни работи соопшти дека, во координација со Оман, ги презема сите неопходни мерки за безбедна навигација на бродовите. Портпаролот Есмаил Багаеи истакна дека Вашингтон со договорот се обврзал на укинување на економските санкции и учество во обновата на Иран.
Постигнувањето на договорот позитивно влијаеше и врз светските пазари, кои забележаа раст и олеснување поради избегнувањето на дополнителна ескалација на Блискиот Исток.
Сепак, состојбата во регионот останува кревка. Во јужен Либан, во селото Кфар Тибнит, е забележан нов смртоносен напад во кој, според локалните медиуми, загинало едно лице. Израелските власти засега не го коментираат инцидентот, додека израелски пратеник за BBC порача дека Израел ќе направи „сè што е потребно“, нагласувајќи дека земјата има намера да го задржи своето воено присуство во Либан.
