По невремето во Скопје, Левица бара итна финансиска помош за оштетените граѓани

Советничката група на Левица во Советот на Град Скопје ќе иницира свикување вонредна седница со единствена точка на дневен ред – формирање фонд за обештетување на граѓаните кои претрпеле штети од невремето во главниот град.

Од партијата посочуваат дека невремето предизвикало значителна материјална штета врз домови, возила и друг имот, поради што сметаат дека Град Скопје треба да обезбеди итна финансиска поддршка за погодените граѓани.

— реклама —

„Во вакви околности, Градот има обврска да обезбеди итна финансиска поддршка за граѓаните кои претрпеа штети, наместо товарот целосно да падне врз нив“, соопшти Левица.

— реклама —

Од партијата оценуваат дека последиците од невремето покажале недоволна подготвеност на надлежните институции. Според Левица, со години биле игнорирани барањата за кастрење и отстранување на опасните дрвја, недостигале превентивни мерки, а градските претпријатија не биле доволно подготвени за справување со кризна состојба.

Покрај формирањето на фондот, советничката група ќе побара Комисијата за безбедност при Град Скопје да отвори расправа за мерките за превенција и справување со слични елементарни непогоди во иднина.

— реклама —

Најавено е и предлагање конкретни мерки за воспоставување поефикасен систем за превенција, рано предупредување и координација меѓу надлежните служби.

— реклама —

Левица ги повика сите советници во Советот на Град Скопје да ја поддржат иницијативата, оценувајќи дека станува збор за мерка од непосреден интерес за граѓаните кои претрпеле штети.

Од партијата очекуваат Советот без одлагање да донесе одлука за формирање на фондот, но и да започне процес за воведување системски мерки со кои би се намалил ризикот од слични последици во иднина.