МВР презема мерки против профилите од кои се ширеа непоткрепени информации дека водата во Скопје е загадена со ешерихија коли и дека на Инфективната клиника веќе имало два случаи поврзани со наводната контаминација.
Од Министерството за внатрешни работи за „Скопје1“ потврдија дека постапува Секторот за компјутерски криминал, дека се утврдуваат профилите на лицата кои ги објавувале ваквите информации и дека тие се повикуваат на информативен разговор.
„Во врска со вашите прашања ве известуваме дека Секторот за компјутерски криминал при МВР презема соодветни мерки и активности, се утврдуваат профилите на лицата и истите се повикуваат на информативен разговор. По завршување на истражните дејствија соодветно ќе ја информираме јавноста“, велат од МВР за „Скопје1“.
Една од објавите што се ширеа на социјалните мрежи е од профилот на Анета Грујовска. Таа напишала дека добила информација „од сигурни извори“ дека водата во Скопје не била исправна за пиење и дека во неа била пронајдена ешерихија коли, притоа препорачувајќи им на граѓаните да купуваат флаширана вода.
Објавата потоа била споделувана и во други групи и профили, а информацијата брзо се прошири меѓу граѓаните и предизвика вознемиреност.
„Скопје1“ ѝ испрати прашања на Грујовска од каде ја добила информацијата, зошто ја објавила без приложен доказ, каде сѐ ја споделила и дали ќе се извини по официјалните деманти од институциите. До објавувањето на текстот, одговор не добивме.
Непоткрепените објави беа демантирани и од ЈП „Водовод и канализација“ – Скопје и од Клиниката за инфективни болести.
„Водовод и канализација“ објави дека во дневниот мониторинг на 11 август биле земени 42 примероци од водоснабдителниот систем на Скопје, од кои четири од бунарскиот потег Нерези – Лепенец, и дека сите примероци ги исполнувале барањата за безбедност и квалитет на водата за пиење.
Директорот на Клиниката за инфективни болести, Фадил Цана, пак, директно ја демантираше информацијата дека на Клиниката имало два случаи поврзани со наводна контаминација на водата.
„Информациите што се шират на социјалните мрежи дека на Клиниката за инфективни болести се регистрирани два случаи поврзани со наводна контаминација на водата со E. coli не се точни. Во моментов на Клиниката нема регистрирани ниту хоспитализирани пациенти поврзани со ваков настан. Апелираме јавноста да се информира исклучиво од официјални и проверени извори“, изјави Цана за „Скопје1“.
Така, тврдењата што се ширеа за наводно загадена скопска вода и за пациенти на Инфективната клиника не добија потврда од ниту една надлежна институција, а МВР сега утврдува кои лица стојат зад профилите од кои информациите биле пласирани и ширени.
