По речиси осум години ќе биде изречена пресудата за уривањето на мостот во Џенова, во трагедијата загинаа 43 лица

Речиси осум години по уривањето на мостот Моранди во Џенова, во трагедија во која животот го загубија 43 лица, денеска се очекува судот да ја изрече пресудата во една од најголемите судски постапки во Италија.

Во судницата се очекува да присуствуваат семејствата на жртвите, додека пресудата ќе биде соопштена за 57 обвинети. Меѓу нив се поранешни раководители на компанијата „Аутостраде пер л’Италија“, експерти од нејзината инженерска компанија СПЕА, како и поранешни претставници на италијанското Министерство за инфраструктура.

— реклама —

Поголемиот дел од обвинетите се товарат за кривични дела поврзани со небрежност, меѓу кои предизвикување катастрофа од небрежност и повеќекратно убиство од небрежност. Обвинителството смета дека долгогодишното занемарување на одржувањето довело до уривањето на мостот, кој бил дел од важниот патен правец меѓу Северна Италија и Француската Ривиера.

Мостот Моранди се урна на 14 август 2018 година, во пресрет на празникот Ферагосто, кога сообраќајот е меѓу најгустите во Италија. За време на невреме се урна дел од мостот, долг околу 200 метри, при што десетици возила паднале во бездната.

Трагедијата ја потресе Италија и отвори сериозни прашања за состојбата на инфраструктурата и начинот на одржување на клучните сообраќајници.

— реклама —

Обвинителството побарало вкупно речиси 400 години затворски казни за обвинетите, додека одбраната тврди дека причината за уривањето била конструкциски недостаток, а не пропусти во одржувањето.

Судскиот процес траеше повеќе од четири години и опфати над 280 рочишта.

— реклама —

Адвокатот Рафаеле Карузо, кој застапува семејства на три жртви, изјави дека очекуваат судот да потврди дека трагедијата не била случајност, туку последица на сериозни пропусти во одржувањето.

Тој посочи дека во текот на судењето било утврдено дека предупредувања за недостатоци на столбот што се урнал постоеле уште од 1993 година, но не биле преземени соодветни мерки.

Во пресрет на пресудата, извршниот директор на „Аутостраде“, Ариго Џана, објави јавно писмо во кое им се извини на семејствата на жртвите, наведувајќи дека постапките и одлуките на поединци оставиле неизбришливи последици и дека извинувањето претставува морална обврска.

Компанијата „Аутостраде“ и нејзината подружница претходно постигнаа спогодба за корпоративна одговорност, платија околу 30 милиони евра казни и воведоа нови процедури за да спречат слични случаи во иднина.

Новиот мост во Џенова, проектиран од италијанскиот архитект Ренцо Пијано, беше пуштен во употреба во 2020 година и се наоѓа над меморијалниот простор посветен на жртвите од трагедијата.