По смртоносниот топлотен бран, Франција сè повеќе се свртува кон климатизацијата

Франција се подготвува за нов топлотен бран, а високите температури повторно ја отворија дебатата за употребата на клима-уреди – тема што со години предизвикува поделени мислења во земјата.

Во пресрет на најавените горештини, десетици граѓани минатата недела чекаа во редици пред продавници во парискиот регион за да купат клима-уреди. Во предградието Обервилие дошло и до турканици, а дел од купувачите останале без уред поради големата побарувачка, објави Си-ен-ен.

— реклама —

Според француската Агенција за енергетска транзиција, само околу 24 проценти од домаќинствата во Франција имаат клима-уред. Иако тоа е повеќе во однос на пред две години, кога овој процент изнесувал 18, Франција и понатаму значително заостанува зад соседна Италија, каде што околу половина од домаќинствата користат климатизација.

— реклама —

Проблемот е особено изразен во образовниот систем. Само седум проценти од училиштата имаат климатизација, а илјадници училишта минатата недела привремено ја прекинаа наставата поради екстремно високите температури во училниците. Здравствените власти соопштија дека за време на шесте најтопли денови од јунскиот топлотен бран биле регистрирани повеќе од 2.000 смртни случаи поврзани со жештините.

Со децении во Франција владееше отпор кон клима-уредите. Многумина ги сметаа за непотребни, бучни и естетски неприфатливи, а постои и широко распространето верување дека климатизираниот воздух може да предизвика здравствени проблеми. Дополнителна пречка претставуваат и строгите урбанистички правила, особено во Париз, каде што поставувањето надворешни единици на историските фасади е силно ограничено.

— реклама —

Во меѓувреме, климатизацијата стана и политичка тема. Националниот собир на Марин Ле Пен предлага национален план за поставување клима-уреди во сите училишта и болници, како и државна финансиска поддршка за домаќинствата. Дел од левицата, пак, предупредува дека масовната употреба на климатизацијата не смее да биде единствен одговор на климатските промени, иако сè повеќе политичари признаваат дека во одредени објекти таа станува неопходна.

Експертите потсетуваат дека употребата на клима-уреди ја зголемува потрошувачката на електрична енергија, но во Франција поголемиот дел од електричната енергија доаѓа од нискојаглеродни извори, пред сè од нуклеарни централи. Сепак, предупредуваат дека големата концентрација на клима-уреди може дополнително да ги загрее урбаните средини поради испуштањето топол воздух.

За сè поголем број Французи, климатизацијата повеќе не е прашање на удобност, туку неопходна заштита од сè почестите и поинтензивни топлотни бранови.