Недостигот на паркинг места во Општина Центар со години претставува еден од најголемите проблеми со кои секојдневно се соочуваат жителите. Од ЈП „Паркинзи на Општина Центар“ велат дека новиот систем за паркирање има цел да воведе поправедна распределба на јавниот простор и да ги поттикне граѓаните своите гаражи да ги користат за нивната основна намена.
Претпријатието во моментов управува со околу 6.100 паркинг места, додека се издадени повеќе од 16.000 повластени паркинг карти. Според ПОЦ, ваквиот дисбаланс создава сериозен притисок врз јавниот простор и ја наметнува потребата од нов пристап во управувањето со паркирањето.
Оттаму посочуваат дека проблемот не е само во бројот на возила, туку и во фактот што голем дел од приватните гаражи и паркинг-простори не се користат за паркирање. Наместо тоа, тие често се претвораат во магацини, работилници, деловни простории или се издаваат по високи комерцијални цени.
Во населбите како Капиштец, Дебар Маало, Буњаковец и централното градско подрачје, многу сопственици на гаражи ги користат за други намени, додека своите возила ги паркираат на јавните паркиралишта и улиците.
„Јавниот паркинг-простор во Центар е ограничен ресурс. Не е фер ниту одржливо јавниот простор да биде трајно окупиран, додека приватните гаражи стојат празни или се користат за други намени. Наш приоритет е жителите навистина да можат да најдат паркинг во близина на своите домови“, велат од ПОЦ.
Како дел од новите правила, повластените паркинг карти повеќе нема да се издаваат по жител, туку по станбена единица, односно по адреса. Првото возило ќе остане бесплатно, додека за второто и третото возило ќе се плаќа надоместок.
Од претпријатието нагласуваат дека целта не е казнување на граѓаните, туку воведување баланс и пофер користење на јавниот простор.
„Кога приватниот простор не се користи за својата основна намена, целиот товар паѓа врз улиците и јавните паркиралишта. Тоа создава дополнителен метеж и незадоволство кај граѓаните. Затоа ни се потребни јасни правила и фер систем кој ќе обезбеди поодговорно користење на просторот“, додаваат од ЈП „Паркинзи на Општина Центар“.
Според претпријатието, новиот модел треба да придонесе за порационално користење на возилата, поголема искористеност на приватните гаражи и подобра заштита на јавните паркинг места за жителите на кои тие навистина им се неопходни.
