ЈП Паркинзи на Општина Центар соопшти дека управувањето со паркирањето во централното градско подрачје не претставува само наплата, туку систем за подобра организација и поправедно користење на јавниот простор.
Од претпријатието посочуваат дека Општина Центар секојдневно се соочува со голем број возила, ограничен број паркинг места и зголемен сообраќаен метеж, поради што контролата и организацијата на паркирањето стануваат клучни за нормално функционирање на градското јадро.
Според ПОЦ, системот опфаќа обележување и одржување на паркиралиштата, контрола на правилното користење на просторот, следење на почитувањето на правилата и воведување модели што треба да обезбедат порамномерно користење на јавниот простор.
Надзорот го вршат овластени контролори кои користат техничка опрема за евидентирање на регистарските таблички, времето на паркирање и статусот на возилата, со што, како што велат, се овозможува поефикасна контрола.
Од претпријатието нагласуваат дека пајак-службата постапува согласно законските надлежности и во координација со сообраќајната полиција, особено во случаи кога возила се паркирани на тротоари, зелени површини или на места што ја нарушуваат безбедноста и проодноста.
ПОЦ најавува и нов модел на паркирање, според кој повластените паркинг-карти ќе се издаваат по станбена единица, наместо по жител, со цел да се обезбеди поправедна распределба на паркинг просторот.
Воедно, се планира засилена дигитализација на услугите, електронска контрола и можност дел од услугите да се користат преку веб-страница, мобилна апликација и електронски системи за плаќање.
Од претпријатието порачуваат дека крајната цел е создавање поуреден, побезбеден и пофункционален јавен простор за жителите на Центар.
