Македонската музичка сцена вечерва остана без едно од своите најпрепознатливи имиња. По кратко боледување, на една од скопските клиники почина пејачот и музичар Владо Јаневски на 66-годишна возраст.
Со своите безвременски хитови, Јаневски остави длабока трага во македонската и регионалната музика, а неговите песни со децении беа дел од животите на бројни генерации. Публиката ќе го памети по незаборавните нумери „Ако не те сакам“, „Евергрин“, „Дома си е дома“, „И тогаш некоја будала“, „Некогаш и негде“, „Црно тиквешко“, „Ова е наше Скопје“, „Не зори зоро“, „Еден бакнеж“ и многу други.
Владо Јаневски е роден на 27 ноември 1960 година во Скопје. Дипломирал на Филолошкиот факултет на Универзитетот „Св. Кирил и Методиј“, на Катедрата за англиски јазик и книжевност.
Во текот на својата кариера беше член на повеќе музички состави, меѓу кои „Тост сендвич“, „Бон Тон“, „Фотомодел“ и „Ластовица“. Свиреше клавир, гитара и тапани, а зад себе остави шест студиски албуми.
Јаневски ќе остане запаметен и како првиот официјален претставник на Македонија на Изборот за песна на Евровизија во 1998 година во Бирмингем, каде што настапи со песната „Не зори зоро“.
Во својата богата кариера настапуваше на бројни домашни и меѓународни фестивали, меѓу кои „Југовизија“, „Славјански базар“, фестивалите во Кавен, Памуккале и Каиро.
Со заминувањето на Владо Јаневски, македонската музика загуби еден од своите најавтентични и најпрепознатливи гласови.
