Полска остро ѝ одговори на Русија по падот на ракетата

Полското Министерство за надворешни работи го повика рускиот амбасадор и му предаде протестна нота, откако руска крстосувачка ракета Х-101 паднала на територијата на Полска.

— реклама —

Портпаролот на Министерството, Мачеј Вевјур, изјави дека Варшава најостро ги осудува постапките што ја загрозуваат безбедноста на државата и нејзините граѓани.

— реклама —

„Бараме прекин на активностите што ги загрозуваат животите и безбедноста на граѓаните и истовремено претставуваат ризик од воздухопловна катастрофа“, изјави Вевјур, пренесува Ројтерс.

Полските власти потврдија дека проектилот што во четвртокот паднал во источниот дел на земјата е руска крстосувачка ракета Х-101.

— реклама —

Министерот за одбрана на Полска, Владислав Косињак-Камиш, соопшти дека истрагата утврдила оти ракетата била произведена во близина на Москва во вториот квартал од оваа година.

„Тоа значи дека Русија користи новопроизведени ракети во нападите врз Украина. Тоа ги потврдува извештаите дека руските залихи на ракети се исцрпени“, напиша Косињак-Камиш на социјалната мрежа Икс.