Поранешниот командант на Здружената команда на силите на романската армија, генерал-потполковник Дорин Јонита, е пронајден мртов во својот дом во Паулешти, во округот Прахова, Романија.
Шеесет и едногодишниот генерал бил пронајден со прострелна рана во главата, а покрај неговото тело бил пронајден пиштол „Глок“, што легално го поседувал, објавува романскиот весник „Либертатеа“.
Неговата сопруга ги известила властите откако тој, наводно, во текот на ноќта ја напуштил куќата со оружјето и престанал да се јавува на телефон.
Телото на генералот го пронашол неговиот зет. Засега нема индиции дека станува збор за убиство, а истражителите работат на утврдување на сите околности на случајот.
Дорин Јонита бил еден од позначајните офицери во романската армија, со долгогодишна воена кариера и учество во меѓународни мисии. Истрагата е во тек.
