Вицепремиерот и министер за транспорт Александар Николоски денеска изјави дека изградбата на автопатот Скопје-Блаце претставува значаен чекор кон остварување на стратешката цел Македонија да стане важна сообраќајна крстосница на Балканот.
На потпишувањето на Договорот за инвестициски грант меѓу Јавното претпријатие за државни патишта и Европската банка за обнова и развој, Николоски посочи дека за проектот се обезбедени грант-средства во износ од 30,8 милиони евра преку Инвестициската рамка за Западен Балкан (WBIF).
Според него, автопатот е дел од трансевропската рута 6, која ќе ги поврзе Скопје и Приштина, а понатаму ќе продолжи кон Тирана, Драч и Бар, со што ќе се создадат нови можности за трговија, стопанство и туризам.
„Без разлика што немаме излез на море, на овој начин државата може да стане стратешки најважна точка на Балканот, преку која ќе се вкрстуваат бизнисот, трговијата, туризмот и економската размена“, изјави Николоски.
Тој нагласи дека проектот е дел од визијата Македонија да го искористи своето географско значење, како земја низ која минуваат повеќе паневропски транспортни коридори.
Николоски информираше дека предвидениот рок за изградба е четири години, но изрази очекување работите да завршат и пред истекот на рокот.
Посебно истакна дека изведувач на проектот е домашната градежна компанија „Гранит“, оценувајќи дека тоа е потврда оти македонските компании имаат капацитет да реализираат големи инфраструктурни проекти.
Тој упати благодарност до Владата, Јавното претпријатие за државни патишта, Министерството за транспорт, Европската Унија и Европската банка за обнова и развој за поддршката во реализацијата на проектот.
Автопатот Скопје-Блаце ќе биде долг 10,5 километри, а на трасата, која претставува сложен инженерски зафат, ќе бидат изградени околу четириесет објекти.
