Најмалку 12 лица загинаа, а шестмина се повредени во голем шумски пожар што избувна во близина на Лос Гаљардос, во шпанската покраина Алмерија, соопштија властите во Андалузија.
Според регионалната влада, дел од жртвите биле пронајдени во возила што биле зафатени од пламенот. Засега не е потврдена причината за пожарот, иако сведоци тврдат дека огнот избувнал по пад на далновод, по што брзо се проширил во блиската пошумена област.
„Бројот на загинати во пожарот во Лос Гаљардос се искачи на 12 по потврдата за уште шест смртни случаи“, се наведува во соопштението на регионалната влада.
Претседателот на Андалузија, Хуанма Морено, трагедијата ја нарече огромна загуба.
„Скршени сме од тага“, напиша тој на социјалната мрежа Икс.
Во гаснењето на пожарот учествуваат околу 150 пожарникари. Едно лице е хоспитализирано поради вдишување чад, друго се здобило со изгореници, додека уште четворица биле згрижени на местото на настанот поради полесни изгореници и респираторни проблеми.
Пожарот предизвика затворање на повеќе патишта, а околу 1.000 жители беа евакуирани од погоденото подрачје.
Шпанската воена единица за итни случаи (UME) се приклучи на акцијата за локализирање на огнената стихија, додека властите предупредуваат дека екстремните температури дополнително ја отежнуваат борбата со пожарите.
Шпанија, како и други земји во јужна Европа, е погодена од силен топлотен бран со температури што достигнуваат и до 40 Целзиусови степени. Во исто време, големи шумски пожари беснеат и во Франција и Португалија, принудувајќи илјадници луѓе да ги напуштат своите домови.
Според Европскиот информативен систем за шумски пожари (EFFIS), минатата година во Шпанија изгореле рекордни 393.000 хектари земјиште, што е повеќе од шестпати над просекот за периодот од 2006 до 2024 година. Климатската служба „Коперникус“ предупредува дека Европа се затоплува двојно побрзо од глобалниот просек, што придонесува за сè почести и поразорни шумски пожари.
