Во текот на вчерашниот ден и во текот на ноќта во земјава биле регистрирани 29 пожари на отворен простор, од кои 23 се изгаснати, додека шест остануваат активни и утринава, информираше директорот на Дирекцијата за заштита и спасување, Стојанче Ангелов.
Една од најсериозните ситуации била во селото Чаниште, на околу 30 километри од Прилеп. Огнот навлегол меѓу куќите, но, според информациите со кои располага ДЗС, ниту една од куќите во кои живеат преостанатите жители не била опожарена. Изгореле неколку стари и напуштени куќи, од кои дел можеби повремено ги користеле нивните сопственици.
Ангелов упати благодарност до прилепските пожарникари и доброволните пожарникари од Битола, кои биле ангажирани во гаснењето и во текот на ноќта успеале да спречат поголемо ширење на огнот.
Сериозна била и состојбата на територијата на Општина Јегуновце, каде што пожарот навлегол во атарот на Туденце и се приближил до манастир. Поради опасноста биле ангажирани тимови на ДЗС од Гостивар и Скопје, како и доброволно противпожарно друштво од Тетово.
Активен е и пожарот што од Велес се проширил кон Зелениково. Велешките пожарникари со пробивање низ густата вегетација успеале значително да го намалат огнот и да ги заштитат двете загрозени села.
Во Македонски Брод пожарот е значително намален со ангажман на локалните пожарникари, модулот на ДЗС, воздухопловите на Дирекцијата, три ер-трактори и полициски хеликоптер. Пожар има и на територијата на Студеничани, кај Рамни Габер, но огнот е оддалечен од селото и засега нема загрозени населени места.
Ангелов посочи дека кај ниту еден од активните пожари во моментов не гори квалитетна борова или друга зимзелена шума, а во моментов нема загрозени села.
Во меѓувреме, целосно е затрупана депонијата во Кратово, со што, според Ангелов, повеќе не претставува опасност за загадување на воздухот за жителите.
Директорот на ДЗС повторно апелираше до граѓаните да бидат крајно внимателни, бидејќи во услови на висок ризик и една мала искра може да предизвика голема катастрофа.
