Пожарите во Пелагонија ставени под контрола, денеска регистрирани уште 10 нови жаришта

Состојбата со пожарите во Пелагонискиот регион е стабилизирана, откако пожарникарите и тимовите на Дирекцијата за заштита и спасување повеќе од 30 часа се бореа со огнената стихија. Изминатата ноќ била една од најтешките за пожарникарите од почетокот на сезоната.

Во текот на вчерашниот ден биле регистрирани вкупно 40 пожари, а најкритично било во Пелагонискиот регион и кај Богомила, каде што огнот се приближил до првите куќи.

— реклама —

Во гаснењето активно се вклучило и локалното население. Во селото Ивањевци, 34-годишниот Александар Чепиговски со својот трактор и цистерна со вода влегол директно во огнените јазици и помогнал да се спречи ширењето на пожарот што се приближувал до куќите.

Директорот на Дирекцијата за заштита и спасување, Стојанче Ангелов, изјави дека најалармантни биле пожарите во Пелагонискиот регион, кои се заканувале на повеќе села.

— реклама —

„Благодарение на реакцијата на локалните пожарникари, кои беа поддржани со тимовите на ДЗС со четири пинцгауери и тим за брз одговор на Дирекцијата, составен од 20 доброволни пожарникари од доброволното пожарникарско друштво „Архангел“, како и со исклучително силната поддршка на локалното население, овие пожари најпрво беа ставени под контрола, локализирани, а во овој момент најголем дел од нив се изгаснати“, рече Ангелов.

— реклама —

И покрај подобрувањето на состојбата, до 12 часот денеска биле регистрирани најмалку 10 нови пожари на отворено. Во гаснењето се активирани три „Ер трактори“ и полициски хеликоптер, а надлежните очекуваат состојбата да продолжи да се подобрува во текот на денот.

Ангелов информираше и дека во моментот се наоѓа во Општина Јегуновце, во атарот на селото Копанце, каде што е активен високопланински пожар.

— реклама —

Поради непристапниот терен, во гаснењето на пожарот во моментов учествува полициски хеликоптер, по што се очекува да се вклучат и пожарникарите.

Од Дирекцијата за заштита и спасување повторно апелираат до граѓаните на максимална внимателност, особено поради високите температури и зголемениот ризик од брзо ширење на пожарите.