Пожарот што завчера попладне избил во непосредна близина на селото Чаниште се движи во правец на селото Лушевица, информираше директорот на Дирекцијата за заштита и спасување, Стојанче Ангелов.
Во изјава дадена вчера вечерта, Ангелов посочи дека пожарот во тој момент се наоѓал приближно на средината од растојанието меѓу двете села, а огнената линија била многу долга.
Екипите на терен се обидувале да го прекинат еден од краците на пожарот, при што успешно интервенирале со дувалки и напртњачи. Во гаснењето помагало и локалното население, како и доброволниот тим на Дирекцијата за заштита и спасување од Виница.
„Целта е да спасиме колку што можеме повеќе вегетација“, рече Ангелов, додавајќи дека тешко е да се очекува пожарот да биде целосно изгаснат за кратко време.
Тој најави дека борбата со огнот ќе продолжи и денес, со ангажирање на „ер трактори“ и полициски хеликоптер. На терен биле присутни и три возила „пинцгауер“ на ДЗС, како и доброволци од Кочани и Битола.
„Имаме 30 доброволци преку тимовите на Дирекцијата, огнени тимови, ‘пинцгауери’ и пожарникари од Прилеп“, посочи Ангелов.
Сите сили на терен, како што нагласи, работат со цел пожарот да биде намален и ставен под контрола. Дополнителен проблем претставувал ветерот, кој може да влијае врз ширењето на огнот и да ја отежни интервенцијата.
