„Правдата во Македонија бавно доаѓа, но и да дојде, прашање е дали ќе опстои - осудените за „Дурмо Турс“ излегуваат од затвор“, вели Левица

Левица преку соопштение реагира на најновиот развој во предметот „Дурмо Турс“, оценувајќи дека седум и пол години по трагичната несреќа кај Ласкарци, во која загинаа 16 лица, случајот повторно се враќа на почеток.

Од партијата посочуваат дека во предметот биле спроведени истрага, обвинение, вештачења и супервештачења, по што следувала првостепена пресуда. Апелациониот суд ја потврдил вината и ги зголемил казните, а осудените лица веќе биле испратени на издржување затворска казна. Сепак, Врховниот суд ја укинал правосилноста и го вратил предметот на повторно постапување.

— реклама —

Од Левица прашуваат дали ваквиот развој е резултат на случајни пропусти или станува збор за подлабок проблем во системот, во кој големите предмети со години минуваат низ судските инстанци, а кога се очекува конечна разрешница, следуваат укинувања, ослободувања, застарувања или повторно враќање на постапките.

„Јавноста не смее да биде сведена на публика во бескрајна правосудна претстава во која секој суд ја поправа грешката на претходниот, додека никој не сноси одговорност за фактот што грешката воопшто била направена“, наведуваат од партијата.

Левица укажува и на случаи кои, според нив, дополнително ја поткопуваат довербата во правосудството, меѓу кои признанието на поранешен врховен судија за незаконско влијание и постапката против апелациски судија по откривањето стотици илјади евра заѕидани во неговиот дом.

— реклама —

Од партијата го посочуваат „Ласкарци“ како еден од повеќето предмети што ја отвораат темата за неказнивоста. Во „Талир 2“, како што наведуваат, Апелациониот суд ја потврдил ослободителната пресуда.

Во врска со модуларната болница во Тетово, каде што загинаа 14 лица, од Левица посочуваат дека по речиси пет години била затворена предистрагата за јавните набавки, при што, според нив, Венко Филипче практично бил амнестиран.

— реклама —

Партијата го посочува и случајот „Пулс“, во кој загинаа 63 лица, наведувајќи дека според расположливата документација цели 13 години немало противпожарна инспекциска контрола, додека истовремено истекуваат и законските рокови за притвор.

Иако станува збор за различни предмети, Левица оценува дека заедничкиот заклучок е дека државата е ефикасна во најавите и соопштенијата, но не успева навреме да обезбеди стабилна и конечна одговорност.

Од партијата ги критикуваат и ДПМНЕ и СДСМ, оценувајќи дека нивните ветувања за реформи во правосудството се лицемерни. Според Левица, во изминатите три децении двете политички структури ги менувале министрите, законите, кадровските решенија, судските совети и реформските стратегии, но чувството на неказнивост останало.

— реклама —

„Кога за грешката нема одговорен, за пропустот нема последица, предметот нема крај, а семејствата на жртвите со години го следат истиот институционален круг, се поставува прашањето дали процедурата сè уште ја штити правдата или станува пречка за нејзино остварување“, се наведува во реакцијата.

Според Левица, случајот „Ласкарци“ не е изолиран пример, туку уште еден показател за системски проблем поради кој конечната и навремена правда сè потешко стигнува до оние кои ја очекуваат.