Либерално-демократската партија (ЛДП) преку соопштение порача дека почитувањето на правосилните судски одлуки е темел на правната држава, но истовремено предупреди дека довербата во институциите се гради преку еднакви критериуми и доследна примена на законите.
Од партијата велат дека во јавноста се отвора сериозно прашање за тоа како се толкува поимот „јавен интерес“ и дали за сите важат исти правила.
Осврнувајќи се на случајот со Стевчо Јакимовски, ЛДП посочува дека граѓаните со право прашуваат како постапки за кои денес некој се осудува, во други случаи се претставуваат како пример за ефикасност, надминување на административни пречки и заштита на јавниот интерес.
„Ако заобиколувањето на одредени административни процедури е оправдано кога се повикува на јавен интерес, тогаш по кој принцип слични постапки во други случаи се третираат како криминал?“, прашуваат од ЛДП.
Според партијата, различните пораки што институциите ги испраќаат за слични постапки создаваат чувство на селективност и нееднаквост, што дополнително ја поткопува довербата во правосудниот систем.
ЛДП нагласува дека не навлегува во конкретни судски постапки и не пресудува наместо судовите, но смета дека државата има обврска да обезбеди јасни, предвидливи и еднакви правила за сите граѓани.
„Она што е недозволиво во еден случај не смее да биде претставено како доблест во друг. Само преку доследна примена на законите, независни институции и еднаков третман за сите може да се врати довербата во правната држава“, наведуваат од ЛДП.
