Полицијата во полскиот град Семјановице Шлонске расветлила три разбојништва извршени во период од само неколку дена. Под сомнение дека учествувале во кривичните дела, уапсени се четири лица – тројца мажи и една жена, на возраст од 17 до 31 година.
Како што било утврдено во текот на истрагата, осомничените во периодот од 18 до 20 август стапувале во контакт со жртвите преку сајт за запознавање, а потоа со нив договарале средби.
Кога ќе се сретнеле на договорената локација, осомничените користеле физичка сила и им ги одземале личните предмети на жртвите.
Во еден од случаите бил употребен и нож, при што жртвата се здобила со телесни повреди.
Два од грабежите се случиле на 18 август, додека третиот бил извршен на 20 август, на подрачјето на Семјановице Шлонске.
„Полицајците веднаш по пријавите започнаа интензивна оперативна работа за да ги идентификуваат лицата одговорни за нападите. Собраните информации и преземените полициски активности им овозможија за само неколку дена да го утврдат идентитетот на осомничените“, соопшти полската полиција.
Четворицата осомничени биле уапсени на 24 август. Станува збор за лица со живеалиште во Семјановице Шлонске, Битом и Бенџин.
Врз основа на собраните докази, против нив биле поднесени кривични пријави за разбојништво и нанесување телесни повреди.
По предлог на обвинителството, судот на сите четворица им определил притвор во траење од три месеци.
За кривичните дела за кои се товарат, осомничените се соочуваат со казна од две до 20 години затвор.
