Притвор и куќен притвор за двете финансиски раководителки во „Државна лотарија“ за проневера на 1,3 милиони евра

Судија на претходна постапка од Основниот кривичен суд Скопје определил притвор и куќен притвор за две финансиски раководителки во АД „Државна лотарија“, осомничени за кривично дело „проневера во службата“.

Мерките се определени по предлог на Основното јавно обвинителство Скопје, кое ги сомничи двете лица дека како соизвршителки присвоиле пари што им биле доверени во рамки на нивните службени задолженија.

— реклама —

Според Обвинителството, во текот на 2024 година тие не го уплатиле и не го депонирале целокупниот дневен промет од продажните места на „Државна лотарија“ на трансакциските сметки на друштвото во деловните банки, туку парите ги присвоиле за себе.

— реклама —

На овој начин, според сомненијата, биле присвоени вкупно 79.989.444 денари, односно околу 1,3 милиони евра.

Првоосомничената била директорка на Секторот за финансии и сметководство, додека второосомничената била шефица на финансиски работи во АД за приредување игри на среќа „Државна лотарија“. Обвинителството наведува дека, користејќи ги своите овластувања и должности, заедно учествувале во извршувањето на делото со намера да прибават противправна имотна корист.

— реклама —

Двете биле овластени и за подигнување готовински средства наменети за исплата на мали добивки, како и задолжени за прием и уплата на дневниот промет од сопствените продажни места на друштвото.

— реклама —

Покрај неуплатувањето на дневниот промет, според Обвинителството, од банкарските сметки на „Државна лотарија“ подигале и други парични средства кои, исто така, ги присвојувале за себе.

Двете се сомничат за кривично дело „проневера во службата“ од член 354 став 5 во врска со став 3 и став 1 од Кривичниот законик.