Четиринаесет возачи биле лишени од слобода во текот на изминатото деноноќие поради безобѕирно управување со моторни возила, информира Министерството за внатрешни работи.
Според МВР, двајца возачи во Скопје и Охрид биле затекнати како управуваат со возила под дејство на алкохол. Кај охриѓанецот биле измерени 1,77 промили алкохол во крвта, а тој претходно предизвикал и сообраќајна незгода.
Полициските службеници откриле и повеќе лица кои управувале со возила без да поседуваат возачка дозвола. Меѓу нив се возач на патничко возило од Прилеп, мотоциклист од Куманово и возач на мопед од Битола.
Во посебен случај, 17-годишник од селото Врбјане во Општина Маврово и Ростуше предизвикал сообраќајна незгода управувајќи со мотоцикл без положен возачки испит и без возачка дозвола.
Во Скопје бил сопрен и возач на мотоцикл кој управувал без соодветна категорија и без заштитна кацига.
Дополнително, биле затекнати уште седум лица кои управувале со возила без возачка дозвола. Меѓу нив има возачи на мотоцикли, патнички автомобили и мопед, а едно лице од Скопје без возачка дозвола предизвикало и сообраќајна незгода.
По целосното документирање на случаите, против сите лица ќе бидат поднесени соодветни кривични пријави.
Од МВР апелираат до граѓаните да ги почитуваат сообраќајните правила и прописи, посочувајќи дека возењето без дозвола и под дејство на алкохол претставува сериозна опасност за сите учесници во сообраќајот.
