Државниот архив на Македонија и Државното училиште за рехабилитација на деца и младинци со оштетен вид „Димитар Влахов“ – Скопје го промовираа каталогот „Документи што зборуваат на допир“, во кој се претставени значајни историски документи од архивските депоа и подрачните одделенија на Архивот.
Публикацијата е изработена со легенди на Брајово писмо под секој од претставените документи, со што дел од архивското богатство станува подостапно за лицата со оштетен вид. Каталогот беше промовиран во рамките на програмата за одбележување 35 години независност на Македонија.
На промоцијата присуствуваше и министерката за образование и наука Весна Јаневска, која ја поздрави заедничката иницијатива на двете установи.
„Државниот архив чува огромно историско и документарно богатство кое раскажува за создавањето на македонската држава. Со овој каталог, дел од тоа богатство станува достапно и преку Брајовото писмо – азбуката на допир за лицата со оштетен вид, кои ќе можат да ги почувствуваат информациите содржани во автентичните документи и да ја доживеат историјата“, рече Јаневска.
Таа нагласи дека историјата треба да биде достапна за сите и дека инклузивното општество се гради преку конкретни чекори што ги отстрануваат бариерите и овозможуваат еднаков пристап до знаењето, информациите и националното наследство.
„Овој каталог отстранува една таква бариера. На лицата со оштетен вид им овозможува еднаков пристап до историјата и националното наследство“, посочи министерката.
Јаневска изрази очекување вакви публикации да продолжат да се издаваат и во иднина, бидејќи, како што рече, има уште многу историски документи кои заслужуваат да бидат достапни до што поголем број граѓани.
„Документите не треба само да се чуваат. Тие треба да живеат, да се читаат и да се истражуваат. А со оваа публикација, тие денес почнуваат да зборуваат и на еден поинаков, но подеднакво моќен начин – на допир“, додаде Јаневска.
