Протести во Чешка, Германија и Италија поради медиумите, депортациите и високите трошоци за живот

Протести поради финансирањето на јавните медиуми, депортациите и зголемените трошоци за живот денеска се одржаа во повеќе европски земји. Во Чешка, илјадници граѓани се спротивставија на промените во финансирањето на јавниот сервис, во Германија се протестираше против депортациите во Авганистан, додека во Италија антивоените собири во некои градови прераснаа во тензии и судири со полицијата.

— реклама —

Во Чешка, илјадници луѓе се собраа во Брно и во други градови против предлогот за укинување на претплатата за Чешката телевизија и Чешкото радио, со што нивното финансирање би се префрлило во државниот буџет. Демонстрантите предупредија дека ваквата промена може да ја загрози независноста на јавните медиуми. Владејачката коалиција, пак, смета дека реформата е оправдана. Протести имаше и во Прага, каде што полицијата спречила група демонстранти да влезе во парламентот.

— реклама —

Во Германија, стотици луѓе протестираа на аеродромите во Лајпциг, Франкфурт, Берлин, Келн и Дизелдорф против депортациите во Авганистан, притворањето на мигрантите и соработката на германската влада со талибанските власти. Демонстрантите се спротивставија на враќањето на лицата чии барања за азил биле одбиени.

— реклама —

Во Италија, антивоениот марш во Рим заврши без поголеми инциденти, но во други градови беа забележани тензии. Најнапната ситуација била во Торино, каде што неколку илјади демонстранти се собрале на плоштадот Кастело. Полицијата употребила штитови и палки за да ги спречи да се упатат кон улицата Виа По, а потоа ги потиснала кон друг дел од градот.

Во Милано, околу 200 луѓе, главно студенти, протестираа со палестински знамиња и транспаренти против владата на премиерката Џорџа Мелони. Собирот дотогаш се одвивал мирно, додека полицијата формирала кордон. Во меѓувреме, неколку млади луѓе биле приведени на различни локации во градот, но не е потврдено дека приведувањата се поврзани со протестите.