Десетици лица протестираа пред канцеларија на иранското Министерство за надворешни работи во североисточниот град Машхад, изразувајќи незадоволство од најавите за можен мировен договор меѓу Иран и САД.
Според снимките објавени на социјалните мрежи, демонстрантите скандирале пароли против шефот на иранската дипломатија Абас Арагчи, нарекувајќи го „предавник“. На видеата се гледаат жени облечени во црни чадори кои носат црвени и црни знамиња и упатуваат критики кон преговарачкиот тим.
Протестите следуваат по телевизиско интервју на Арагчи, во кое тој зборуваше за можноста за постигнување мировен договор со Соединетите Американски Држави.
Незадоволството доаѓа во момент кога американскиот претседател Доналд Трамп и пакистанските посредници најавуваат дека договорот би можел да биде потпишан во најскоро време, додека од Техеран испраќаат повнимателни пораки и нагласуваат дека конечна одлука сè уште не е донесена.
Критичарите на договорот, особено од редовите на иранските тврдокорни кругови, сметаат дека предвидените отстапки не се во интерес на државата. Тие тврдат дека договорот би можел да го ограничи влијанието на Иран врз Ормускиот Теснец – една од најважните светски поморски рути за транспорт на нафта и гас.
Во интервјуто, Арагчи изјавил дека евентуалниот договор би предвидувал укинување на американската поморска блокада на иранските пристаништа, воведена како одговор на ограничувањата што Техеран ги наметна во Ормускиот Теснец.
Тој нагласил дека „управувањето со Ормускиот Теснец повеќе нема да биде исто како порано“, оценувајќи дека контролата врз теснецот претставува важен инструмент за одвраќање на притисоците врз Иран.
На социјалните мрежи се појавија и други непотврдени видеа на кои се слушаат повици за оставка на Арагчи, но и на претседателот на иранскиот парламент и главен преговарач Мохамад Багер Галибаф.
И покрај оптимистичките најави од Вашингтон и Исламабад, иранските власти засега остануваат воздржани околу можниот датум за потпишување на договорот.
