Крузерот „Celestyal Discovery“ стана првиот патнички брод што го поминал Ормускиот теснец од почетокот на конфликтот, во услови на постепено стабилизирање на поморскиот сообраќај во регионот.
Бродот, кој плови под малтешко знаме, денес исплови од Дубаи, каде што беше закотвен 47 дена, а неговата крајна дестинација е Оман. Според информациите, крузерот се движи без патници, објави Euronews.
Преминот низ теснецот се случил неколку часа откако Иран и САД соопштиле дека стратешкиот пловен пат повторно ќе биде целосно отворен за комерцијален сообраќај до крајот на примирјето. Ормускиот теснец, кој во текот на конфликтот беше речиси затворен, е еден од најважните морски коридори во светот.
Според податоците на сервисот MarineTraffic, пристигнувањето на бродот во Оман се очекува во текот на утрешниот ден. Ситуацијата останува во развој и ќе биде дополнително ажурирана со нови информации.
