Започна официјалната посета на претседателот на Швајцарската Конфедерација, Ги Пармелан, кој денеска престојува во Република Македонија.
Претседателката Гордана Сиљановска-Давкова го пречека швајцарскиот претседател со највисоки државни и воени почести, по што се одржа тет-а-тет средба меѓу двајцата претседатели. Потоа следеше пленарен состанок на македонската и швајцарската делегација.
Во рамки на разговорите беа разгледани севкупните билатерални односи, при што беше оценето дека тридецениската соработка меѓу двете држави е пријателска, стабилна и продуктивна.
Претседателката Сиљановска-Давкова изрази благодарност за континуираната поддршка од Швајцарија во процесот на евроинтеграциите на земјава, како и за значајната поддршка преку донации во повеќе клучни области, меѓу кои владеењето на правото, јакнењето на демократските институции, транзицијата кон зелена и обновлива енергија и заштитата на природните ресурси, особено водата.
Таа истакна задоволство од реализацијата на првата официјална посета на швајцарски претседател на земјава, нагласувајќи дека со тоа се потврдува и дополнително зацврстува партнерството меѓу двете држави.
