Првите 30.000 вакцини против грип пристигнаа во Македонија, вакцинацијата почнува меѓу 16 и 25 октомври

Набавката на вакцини против сезонски грип продолжува, а здравствените власти очекуваат во земјава да бидат обезбедени вкупно 80.000 дози. Првите 30.000 вакцини веќе пристигнаа, а почетокот на имунизацијата е планиран за периодот од 16 до 25 октомври, информираше министерот за здравство Сашо Клековски.

— реклама —

Во следните недели се очекува да пристигнат дополнителни количества. Според најавите, до 15 ноември треба да биде испорачана уште една пратка од 26.000 дози. Министерството за здравство, во меѓувреме, ја организира распределбата на вакцините во соработка со центрите за јавно здравје.

— реклама —

Клековски посочи дека пристигнувањето на првите дози овозможува вакцинацијата навреме да започне кај лицата со најголем ризик од компликации од сезонскиот грип. Тој најави дека и самиот ќе се вакцинира за да ги поттикне граѓаните да се пријават и да се заштитат.

Според министерот, имунизацијата во Македонија се очекува да започне порано отколку во некои соседни земји, каде што почетокот е најавен за ноември.

— реклама —

Граѓаните што сакаат да се вакцинираат треба да се пријават преку соодветниот модул во системот „Мој термин“. На овој начин здравствените институции ќе можат да го утврдат интересот за вакцинација и полесно да го организираат процесот.

Целта на Министерството е со пристигнувањето на дополнителните пратки да се достигне планираната бројка од 80.000 вакцини.