Над 66 илјади граѓани се пријавиле за вакцинација против сезонски грип, има доволно вакцини за сите, уверува Клековски

Министерот за здравство Сашо Клековски уверува дека има доволно вакцини против сезонски грип за сите пријавени граѓани и ги повика да имаат трпение додека не ги добијат термините за вакцинација.

— реклама —

„Сезоната на грип е најизразена во јануари и февруари. Вакцинацијата спроведена до првата недела од јануари обезбедува навремена заштита. Словенија и Хрватска ќе започнат со вакцинација во ноември – и тоа не е доцна“, изјави Клековски.

— реклама —

Од почетокот на кампањата, на 14 октомври, се пријавиле 66.821 граѓанин, со просек од 4.455 пријави дневно. Најголем дел се лица постари од 65 години, а по нив следуваат хронично болните. Најмногу пријави има во Скопје – 19.767, потоа во Битола – 4.845, Прилеп – 3.844, Струмица – 3.585 и Тетово – 3.581.

Досега се закажани 6.710 термини, а вакцинирани се 3.266 граѓани. Во последните три работни дена биле вакцинирани по околу 1.000 лица дневно.

— реклама —

Според Министерството за здравство, реализирани се 86,7 отсто од термините што веќе поминале, додека 503 граѓани не се појавиле на закажаната вакцинација. Од Министерството апелираат граѓаните што не можат да дојдат да го откажат терминот за да може да биде доделен на друг пријавен.

Од оваа недела, тимови од здравствените домови започнале со вакцинација во домовите за стари лица, а од следната недела ќе вакцинираат и во центрите за дијализа. Воедно, започнува нова група закажувања, со што дневниот капацитет треба да се зголеми на околу 1.700 вакцинации.