Речиси 25.000 граѓани се пријавиле за бесплатна вакцинација против грип

Речиси 25.000 граѓани досега поднеле пријава за бесплатна вакцинација против сезонски грип преку интернет-страницата vakcinacija.mk, покажуваат најновите податоци од системот „Мој термин“. Имунизацијата, според најавите, треба да започне во периодот од 16 до 25 октомври.

— реклама —

Министерството за здравство информира дека е обезбедена првата пратка од 30.000 дози од вакцината GCFLU Multi inj., произведена од јужнокорејската компанија „GC Biopharma Corporation“.

— реклама —

Станува збор за тривалентната вакцина на „GC Biopharma“ за 2026 година, одобрена од Светската здравствена организација. Од Министерството наведуваат дека се исполнети строгите критериуми за квалитет и дека се обезбедени соодветните сертификати од производителот и од референтна лабораторија за контрола на квалитетот во рамките на мрежата ОМЦЛ.

Првата пратка е обезбедена преку заем во рамките на меѓународната соработка со УНИЦЕФ и Албанија.

— реклама —

Дополнителни 26.000 дози од францускиот производител „Санофи“ се очекува да пристигнат до 15 ноември, додека преговорите за обезбедување на преостанатите 24.000 дози сè уште траат.

Од Министерството за здравство посочуваат дека комисијата за имунизација ќе ги утврди приоритетните групи граѓани кои ќе имаат предност при вакцинацијата.