Градоначалникот на Општина Центар, Горан Герасимовски, најави нови правила за паркирање со кои, како што рече, треба да се воведе повеќе ред и фер користење на паркинг-просторот во најфреквентната општина во државата.
Во гостување во Дневникот на Сител телевизија, Герасимовски истакна дека првото возило за жителите на Центар ќе остане бесплатно, додека за второто ќе се наплаќа, а третото возило ќе се третира како луксуз.
„Недозволиво е во еден стан да има три или четири автомобили и потоа да се чудиме зошто нема место за паркирање пред домот. Нема доволно паркинг места за толкав број возила“, изјави Герасимовски.
Тој посочи дека новиот правилник е резултат на анализа што траела околу година и половина, спроведена од ЈП ПОЦ и Општина Центар, како и по бројни средби со граѓаните.
Според него, во моментов има околу 15.800 издадени налепници за паркирање, а само околу 6.100 паркинг места, што, како што рече, покажува дека системот мора да се уреди.
Герасимовски нагласи дека во минатото имало злоупотреби со фиктивни адреси и користење поволности од лица што реално не живеат во Центар.
„Целта е граѓаните што навистина живеат тука и имаат едно возило да можат нормално да паркираат пред својот дом“, рече тој.
Тој додаде дека одржувањето на паркинзите бара функционален и финансиски одржлив систем.
„Не може за 100 денари годишно да се очекува паркингот да биде обележан, осветлен, одржуван и контролиран. Ако сакаме квалитетна услуга, мора да постои одржлив систем“, истакна Герасимовски.
Градоначалникот посочи и дека дел од јавните паркинзи во Капиштец, кај „Нова Македонија“ и во близина на Цветен пазар остануваат полупразни во вечерните часови, додека дел од граѓаните избегнуваат да користат платени и безбедни паркинг-простори.
Според него, новите мерки во наредните месеци треба да донесат повеќе ред, подобра организација и повеќе слободни места за жителите на Центар.
