Членката на Извршниот одбор на Либерално-демократска партија, Виолета Здравковска, порача дека е неопходна итна модернизација на изборниот процес и воведување електронско гласање како современо решение.
Таа нагласи дека дебатите за т.н. „Пржинска влада“ се надминати и не одговараат на предизвиците на денешницата, оценувајќи дека фокусот треба да се префрли кон системски решенија базирани на технологија.
Здравковска истакна дека е понижувачки граѓаните да се убедуваат дека не се способни за дигитални процеси, посочувајќи дека земји како Естонија веќе со години успешно применуваат електронско гласање.
Според неа, државата располага со знаење, поддршка од Европската унија и технолошки предуслови, вклучително и биометриска идентификација, но недостига политичка волја за спроведување на реформите.
Таа додаде дека ЛДП не се залага за нови функции и привилегии, туку за воспоставување систем што ќе биде отпорен на манипулации и ќе обезбеди фер изборен процес.
Од партијата најавуваат дека ќе продолжат да се залагаат средствата да се насочат кон дигитализација на изборите, наместо кон, како што велат, скапи и неефикасни политички решенија.
