Пуштена во употреба нова спортска сала во ОУ „Круме Кепески“ во Припор

Учениците од подрачниот објект на ОУ „Круме Кепески“ во Припор, Општина Кисела Вода, од денеска имаат нова спортска сала, изградена со инвестиција од речиси 20 милиони денари.

— реклама —

Новата сала се простира на 500 квадратни метри и е наменета за реализација на наставата по физичко образование, но и за спортски активности на учениците. Проектот е реализиран преку владиниот повик за капитални инфраструктурни проекти во општините.

На пуштањето во употреба присуствуваа премиерот Христијан Мицкоски, министерката за образование и наука Весна Јаневска и градоначалничката на Кисела Вода Бети Стаменкоска Трајкоска.

— реклама —

Јаневска истакна дека модернизацијата на образовната инфраструктура е еден од приоритетите на Владата. Таа посочи дека во изминатите две години бил реализиран инвестициски циклус од повеќе од 70 милиони евра во 90 инфраструктурни проекти во образованието.

— реклама —

Во Кисела Вода, како што информираше министерката, во тек е изградба на спортска сала во ОУ „Кузман Јосифовски – Питу“, како и реконструкција на спортските сали во централниот објект на „Круме Кепески“ и во ОУ „Кузман Шапкарев“ во Драчево.

Најавени се и проширувања на три основни училишта во општината – „Круме Кепески“, „Кузман Шапкарев“ и „Рајко Жинзифов“, каде што ќе бидат доградени по шест училници со цел создавање услови за воведување едносменска настава.

Јаневска порача новата сала да се користи интензивно и одговорно, како простор во кој учениците ќе создаваат спомени, ќе спортуваат, ќе се рекреираат и ќе ги постигнуваат своите идни успеси.