Рускиот претседател Владимир Путин оцени дека војната во Украина се приближува кон својата завршна фаза, повикувајќи се на, како што рече, анализите на состојбата на бојното поле и текот на воените операции.
На прес-конференција по завршувањето на официјалната посета на Казахстан, Путин изјави дека актуелната состојба на фронтот дава основа за таква проценка, но додаде дека во услови на активни борбени дејства не е можно да се предвидат конкретни рокови за завршување на конфликтот.
Според него, руските сили се наоѓаат во офанзива долж целата линија на фронтот во Украина, додека западните политички лидери, како што рече, имаат интерес конфликтот да продолжи.
Путин ги отфрли тврдењата дека Русија претставува закана за европските држави и оцени дека предупредувањата за наводни руски планови за агресија кон Европа се неосновани. Тој нагласи дека Москва не води агресивна политика кон западните земји и повтори дека Русија е подготвена за мирно решавање на конфликтот.
Во своето обраќање, рускиот претседател повторно ја обвини западната алијанса дека не ги исполнила претходните ветувања во врска со проширувањето на НАТО кон исток, оценувајќи дека Русија била доведена во заблуда во изминатите децении.
Осврнувајќи се на можните мировни иницијативи, Путин изјави дека засега нема конкретен европски посредник во разговорите со Москва, но додаде дека Русија би ги разгледала сите предлози доколку бидат доставени.
Тој се осврна и на нападот врз училишен интернат во Старобелск, тврдејќи дека во западните медиуми не му било посветено доволно внимание. Според Путин, рускиот напад врз регионот на Киев бил одговор на тој настан.
Во однос на безбедносната состојба во Балтичкиот регион, рускиот претседател предупреди дека сите локации од кои доаѓа директна воена закана кон Русија можат да бидат третирани како легитимни воени цели. Тој ја коментираше и можноста беспилотни летала да бидат лансирани од територијата на Латвија, нагласувајќи дека Москва ќе ги смета за легитимни цели сите позиции од кои се вршат напади или се создава непосредна воена опасност за Русија.
Изјавите на Путин доаѓаат во период на засилени борби на фронтот и продолжени дипломатски напори за изнаоѓање решение за конфликтот што трае повеќе од четири години.
