Рускиот претседател Владимир Путин изјави дека војната во Украина „се приближува кон крај“, а во исто време остави отворена можност за директна средба со украинскиот претседател Володимир Зеленски – но без да ја иницира самиот.
На прес-конференција во Москва, Путин рече дека не предложил средба со Зеленски, но нагласи дека не ја отфрла таквата опција. Според неговите зборови, доколку некој ја покрене идејата, тогаш „кој сака да се сретне, нека дојде во Москва“.
Во изјавата се осврна и на наводна порака што му била пренесена од словачкиот премиер Роберт Фицо, кој, како што тврди Путин, изразил дека Зеленски е подготвен за личен разговор. Рускиот претседател додаде дека тоа не е првпат да се слушне ваква подготвеност, но не изнесе дополнителни детали за евентуални услови или агенда.
Путин зборуваше и за улогата на САД, оценувајќи дека американскиот претседател Доналд Трамп и неговата администрација „искрено тежнеат кон решение“, бидејќи, како што наведе, на Вашингтон „не му е потребен“ продолжен конфликт.
На прашање кого би сакал да го види како посредник во дијалогот меѓу Русија и Европа, Путин изјави дека најмногу би сакал тоа да биде поранешниот германски канцелар Герхард Шредер.
Рускиот лидер се осврна и на присуството на странски гости во Москва на 9 мај, наведувајќи дека Русија „не повикала никого официјално“, но испратила порака дека ќе ги поздрави оние што ќе дојдат, додавајќи дека нивното доаѓање го смета за чин што заслужува почит.
