Членот на Извршниот одбор на Либерално-демократска партија, Дејанчо Цветановски, преку соопштение предупреди дека работата на групата задолжена за измени на Изборниот законик не се движи во насока на суштински демократски реформи.
Според него, наместо подобрување на изборниот процес, зад затворени врати се прават обиди големите политички партии да ги заштитат своите позиции и да го задржат политичкиот монопол.
Цветановски истакна дека ЛДП активно се вклучила во процесот со цел да придонесе кон унапредување на демократијата и изборниот систем, но дека нивните предлози остануваат игнорирани.
Тој посочи дека партијата и натаму се залага за една изборна единица со отворени листи, модел кој, според ЛДП, би овозможил секој глас да има еднаква тежина, а граѓаните директно да избираат личности наместо партиски листи.
„Иако декларативно се поддржува концептот на една изборна единица, во исто време се предлага висок изборен праг, што претставува обид за елиминирање на помалите партии и затворање на политичкиот простор за нови идеи“, оценува Цветановски.
Од ЛДП порачуваат дека нема да учествуваат во процес кој, според нив, наместо да ја унапредува демократијата, ја уназадува.
Цветановски нагласи дека доколку дискусиите продолжат во истиот правец, партијата ќе ја преиспита потребата од своето понатамошно учество во работната група.
„Доколку големите партии сакаат да донесат Изборен законик по сопствена мерка, тоа ќе мора да го направат сами и да се соочат со оценката на граѓаните, без поддршка од ЛДП“, порача тој.
