Албанскиот премиер Еди Рама ги отфрли растечките протести против планираниот луксузен туристички комплекс на островот Сазан и во областа Звернец, оценувајќи дека станува збор за политички мотивирана кампања која, според него, е дополнително поттикната од критичарите на американскиот претседател Доналд Трамп.
Во интервју за „Политико“, Рама застана во одбрана на проектот поврзан со Џаред Кушнер, зет на Трамп, и порача дека инвестицијата нема да претставува закана за фламингата и останатиот див свет во регионот.
Последните денови илјадници граѓани протестираат против плановите за изградба на луксузен туристички комплекс на островот Сазан и во крајбрежната област Звернец кај Валона. Еколошките организации предупредуваат дека проектот би можел да ги загрози природните живеалишта на фламингата, морските желки, медитеранските фоки и повеќе од 200 видови птици преселници.
Рама, сепак, смета дека дел од меѓународните критики се должат на политичката поврзаност на инвеститорот.
„Да не беше Џаред, никого немаше да го интересира што се случува во Албанија“, изјави Рама на маргините на самитот ЕУ – Западен Балкан во Тиват.
Тој оцени дека „мразителите на Трамп“ помогнале протестите да добијат поголемо внимание и поддршка отколку што реално имаат на терен.
Проектот, кој го поддржуваат катарски и локални инвеститори, предвидува изградба на до 10.000 хотелски соби и вили во подрачје кое претходно уживаше висок степен на заштита. Еколошките организации предупредуваат дека за проектот сè уште нема целосна проценка на влијанието врз животната средина.
Албанскиот премиер истакна дека привлекувањето странски инвестиции останува клучен дел од економската стратегија на неговата влада.
„Странците се наш приоритет бидејќи тие носат пари во земјата за Албанците“, рече Рама, додавајќи дека албанската економија значително пораснала откако тој е на власт.
Тој ги отфрли и шпекулациите за наводни тајни договори поврзани со проектот, како и тврдењата дека туристичкиот комплекс би можел да се користи за преселување Палестинци од Појасот Газа.
Според Рама, дел од кампањата против проектот е резултат на организирани дезинформации, а во нив, како што тврди, има и влијание од Иран.
„Никој друг нема интерес да поттикнува наратив на антисемитизам базиран на неверојатни и злонамерни лажни вести“, изјави албанскиот премиер.
И покрај критиките и протестите, Рама останува уверен дека проектот нема да ги загрози амбициите на Албанија за членство во Европската Унија до 2030 година.
„Европските лидери ќе можат со свои очи да видат како фламингата и развојот можат прекрасно да коегзистираат“, порача Рама.
