Разврска: Судот одобри таткото на Меланија да биде однесен на психијатрија во Демир Хисар, а МВР најави дека ќе го расчистува случајот

Откако физиотерапевтката Меланија Цветковска од Куманово јавно побара помош, тврдејќи дека со години живее во страв од семејно насилство и дека институциите не реагираат, Министерството за внатрешни работи соопшти дека веќе постапува по случајот и дека лицето е спроведено во Психијатриската болница во Демир Хисар.

— реклама —

„Ве информираме дека Секторот за внатрешни работи Куманово е запознаен со случајот и интензивно се работи на негово расчистување. По консултација со Основното јавно обвинителство и други надлежни институции ќе бидат преземени конкретни мерки против П.Ц. од Куманово. Лицето се спроведува во Психијатриската болница Демир Хисар, а по претходно добиено решение од Основниот суд Куманово“, соопштија од МВР без да кажат колку долго може и ќе биде хоспитализиран во установата.

— реклама —

Меланија претходно преку видео-обраќање на социјалните мрежи побара итна институционална реакција, наведувајќи дека таа, нејзината мајка, баба и брат со церебрална парализа со години живеат со човек кој, според неа, постојано е под дејство на алкохол, има дијагностицирани ментални растројства и им се заканува.

— реклама —

Таа тврдеше дека татко ѝ претходно бил хоспитализиран во Психијатриската болница во Скопје во 2019 година и во Психијатриската болница „Бардовци“, но дека во повеќе наврати семејството не успевало да обезбеди негов повторен прием.

Во своето обраќање Цветковска порача дека не бара сожалување, туку помош од институциите, предупредувајќи дека стравува да не дојде до трагедија. По објавувањето на случајот, МВР потврди дека се преземаат мерки и дека лицето е спроведено во психијатриска установа по судско решение.