Физиотерапевтката Меланија Цветковска од Куманово јавно побара помош од институциите, тврдејќи дека со години живее во страв поради семејно насилство од нејзиниот татко, кој, како што наведува, е постојано под дејство на алкохол и има дијагностицирани ментални растројства.
Во видео-обраќање на социјалните мрежи, таа вели дека не бара сожалување, туку итна реакција од надлежните институции.
„Денеска се обраќам како жртва на семејно насилство и како некој што бара ужасно многу помош од институциите. Барам да бидам слушната, не барам да бидам сожалувана, не барам да читам коментари, не барам да ме тапка никој по рамо, само сакам да бидам слушната од институциите и барам помош“, вели Меланија.
Таа тврди дека нејзиниот татко бил хоспитализиран во Психијатриската болница во Скопје во 2019 година, а минатата година и во Психијатриската болница „Бардовци“, но дека повеќепати добивале одговор дека нема место за нов прием или дека состојбата не е доволно сериозна.
„Ние сме три жени кои живееме со човек кој постојано се заканува дека ќе нѐ убие. Кој имал обиди и за самоубиство и за убиство кон нас. Денеска викнавме полиција и цел ден сме по институции. Сите нѐ одбиваат и никој не сака да го прими во психијатриска установа“, вели таа.
Меланија раскажува дека покрај мајка ѝ и баба ѝ, во домот живее и нејзиниот брат со церебрална парализа, кој, според неа, со години е изложен на истите трауми.
„Имам брат со церебрална парализа кој живее со нас и ги има преживеано овие трауми. Неговата здравствена состојба беше многу лоша последнава година. Постојано сме по болници, а тој и таму доаѓаше во алкохолизирана состојба“, вели таа.
Таа додава дека не бара совети да се отселат или да се разведат родителите, бидејќи, како што вели, немаат финансиски можности, а нивниот дом е единствениот приспособен за инвалидската количка на нејзиниот брат.
На крајот од обраќањето упати апел до институциите и до јавноста да ѝ помогнат да добие одговор каде може да биде сместено лице со ваква здравствена состојба, пред, како што вели, да се случи трагедија.
„Не сакам да стигнеме до степен каде ќе има жртви. Кажете ми кој е одговорен за ваква личност да се смести во психијатриска установа или најдете ми сместување каде брат ми ќе биде на сигурно“, порача Меланија.
