Реконструираната Стара чаршија во Гевгелија денеска беше пуштена во употреба, а во рамките на проектот биле обновени 27 објекти, за кои Министерството за транспорт ги издало потребните одобренија.
На настанот присуствуваа премиерот Христијан Мицкоски, заменик-претседателот на Владата и министер за транспорт Александар Николоски, министерот за култура и туризам и градоначалникот на Гевгелија Андон Сарамандов.
Николоски истакна дека Министерството за транспорт издало вкупно 27 одобренија за реконструкција на објектите, како дел од активностите за заштита и обновување на културното наследство.
„Драго ми е што Министерството за транспорт можеше да помогне во реализацијата на обновувањето на Старата чаршија во Гевгелија. Издадени се вкупно 27 одобренија за реконструкција на 27 објекти коишто навистина прекрасно изгледаат“, рече Николоски.
Тој се заблагодари на Управата за заштита на културното наследство, Министерството за култура, Министерството за транспорт и Општина Гевгелија за заедничката работа на проектот. Посочи дека, покрај одобренијата за реконструкција на објектите, биле издадени и соодветни дозволи и решенија за партерно уредување, реконструкција на пристапните улици и на главната улица во чаршијата.
Николоски информираше и дека во Гевгелија преку државниот буџет дополнително се инвестираат околу 165 милиони денари во различни инфраструктурни проекти.
„Дел се завршени, дел се во тек. Тука се трите големи проекти кои веќе се завршени и кои ги реализиравме преку Министерството за транспорт во соработка со Општина Гевгелија во селата Моин, Прдејци и Богородица“, изјави тој.
Меѓу проектите што се реализираат ги посочи и завршувањето на западниот булевар „Св. Климент Охридски“, реконструкцијата на улиците „Железничка“, „Маршал Тито“, „Гевгелиски партизански одреди“ до железничката станица, како и улицата „Новопланирана“.
Николоски најави дека поддршката за Општина Гевгелија ќе продолжи и во наредниот период, со реализација на нови проекти во соработка со локалната самоуправа.
