Рекорд во Јапонија: Бројот на стогодишници за првпат надмина 100.000

Јапонија за првпат има повеќе од 100.000 стогодишници, покажуваат најновите податоци на јапонското Министерство за здравство. Во земјата сега живеат 107.677 лица на возраст од 100 или повеќе години, што е за 7.914 повеќе во споредба со минатата година.

— реклама —

„Драго ни е што многу луѓе живеат подолго и остануваат активни благодарение на напредокот на медицинската технологија“, изјавил министерот за здравство, Кеничиро Уено.

Бројот на стогодишници во Јапонија расте 56 години по ред. Кога земјата почнала да ја води оваа статистика во 1963 година, имало само 153 лица постари од 100 години. По 25 години, бројот надминал 10.000.

— реклама —

Жените сочинуваат околу 88 отсто од сите стогодишници. Јапонија е меѓу земјите со најдолг животен век во светот – жените во просек живеат до 87 години, а мажите до 81 година.

— реклама —

Но, додека бројот на највозрасните жители расте, вкупното население на Јапонија забрзано се намалува поради ниската стапка на наталитет и релативно малата доселеничка стапка. На почетокот на годинава бројот на јапонски државјани за првпат по 42 години паднал под 120 милиони, на околу 119,7 милиони.

Само за една година населението се намалило за 917.000 жители, бројка приближна на населението на еден голем град. Стареењето на населението и нискиот наталитет ги зголемуваат трошоците за социјална заштита и создаваат сè поголем притисок врз јавните финансии.

— реклама —

Јапонија воедно има и највисок јавен долг меѓу индустриски развиените држави.