Поради растот на цените на горивата, падот на популарноста на претседателот Доналд Трамп и продолжениот конфликт со Иран, републиканците ја приспособуваат стратегијата пред изборите за Конгресот на САД во ноември, пишува Ројтерс.
Планот е да се искористи способноста на Трамп да мобилизира гласачи, но без изборите да се претворат во референдум за сè понепопуларниот претседател. На затворен состанок со водечки конзервативни изборни оперативци, неговите советници предложиле кандидатите да ги истакнуваат републиканските даночни намалувања и мерките против инфлацијата.
Меѓу учесниците биле шефицата на кабинетот на Белата куќа, Сузи Вајлс, политичкиот директор Џејмс Блер и анкетарот Тони Фабрицио.
Републиканците сакаат да избегнат Трамп лично да биде во центарот на кампањата, стравувајќи дека неговиот пад на популарноста може да им наштети на кандидатите во неизвесните трки за Конгресот.
Партијата се соочува со тешка битка за задржување на мнозинството во Претставничкиот дом на САД, а расте и ризикот да ја изгуби контролата над Сенатот на САД.
Според анкета на Ројтерс и Ипсос, работата на Трамп ја одобруваат само 36 проценти од Американците, што е најниско ниво во неговиот сегашен мандат. Дел од гласачите, вклучувајќи и некои републиканци, се загрижени и за неговиот темперамент и ментална острина.
Во партијата сепак сметаат дека Трамп останува силен мотиватор за конзервативните гласачи. Од Републиканскиот национален комитет порачаа дека тој и натаму е најсилниот двигател на излезноста.
На состанокот одржан во Валдорф Асторија во Вашингтон, учесниците потпишале договори за доверливост, но деталите брзо протекле во јавноста.
Демократите сметаат дека ослабената поддршка за Трамп им отвора простор да ги поврзат републиканските кандидати со неговите неуспеси.
Трамп во 2024 година водеше кампања како критичар на „глупавите војни“ и се претставуваше како „претседател на мирот“. Сега, според критичарите, раководи со најголемата американска воена операција од инвазијата на Ирак во 2003 година.
Поранешниот преговарач за Блискиот Исток, Арон Дејвид Милер, оцени дека Техеран верува оти има предност поради контролата врз Хормушкиот Теснец и дека може да издржи поголем економски притисок од Трамп. „Иранците мислат дека толеранцијата на Трамп кон економската и политичката цена е ограничена. Подготвени се да го чекаат“, изјавил Милер.
