Романскиот претседател Никушор Дан денеска ја обвини Русија за нарушување на романскиот воздушен простор, откако романската војска по третпат во последните три дена собори беспилотно летало што влегло на територијата на земјата, која е членка на НАТО и Европската Унија.
Повикувајќи се на резултатите од истрагата, Дан изјави дека собореното беспилотно летало било од типот „Шахед“, пренесува „Еурактив“.
„Недозволиво и неприфатливо е Руската Федерација да продолжи да го нарушува воздушниот простор на Романија, кој воедно е и воздушен простор на НАТО и Европската Унија“, напиша Дан на социјалната мрежа Икс.
Министерството за надворешни работи на Романија соопшти дека претходно денеска го повикало рускиот амбасадор на разговор поради новите упади на беспилотни летала во романскиот воздушен простор.
Министерството за одбрана на Романија наведе дека денешниот дрон бил соборен на 12 километри североисточно од Сулина, пристанишен град во делтата на Дунав, во романските територијални води.
Во мај, едно беспилотно летало удри во станбена зграда во Романија, при што беа повредени две лица. НАТО и Европската Унија го осудија инцидентот, оценувајќи дека за него е одговорна Русија и предупредувајќи дека натамошни упади се неприфатливи.
Романскиот парламент годинава усвои закон со кој на армијата ѝ се овозможува да соборува беспилотни летала што ќе го нарушат националниот воздушен простор.
