Романската државна компанија „Нуклеарелектрика“ денеска превентивно исклучи еден реактор во нуклеарната електрана „Чернавода“ поради рекордно низок водостој на реката Дунав, со цел да се заштити системот за ладење на постројката.
Од Министерството за енергетика соопштија дека реакторот е привремено ставен надвор од функција за да се спречат евентуални оштетувања на системот за ладење, кој користи вода од Дунав.
Минатата недела водостојот на Дунав во Романија падна на најниско ниво во последните три децении, поради што властите веќе го ограничија користењето на речната вода за наводнување.
Од „Нуклеарелектрика“ информираат дека одлуката е донесена во согласност со безбедносните процедури што се применуваат во услови на екстремно низок водостој и дека состојбата на реката постојано се следи. Доколку нивото на Дунав продолжи да опаѓа, можно е привремено да биде исклучен и вториот реактор.
Нуклеарната електрана „Чернавода“ располага со два реактора со моќност од по 706 мегавати, кои обезбедуваат околу една петтина од потрошувачката на електрична енергија во Романија.
Поради намаленото домашно производство, земјата дел од потребната електрична енергија во наредниот период ќе го обезбедува преку увоз.
