Русија во текот на два дена го извршила најголемиот воздушен напад од почетокот на војната во Украина, напаѓајќи го Киев и други градови со стотици дронови и ракети, соопштија украинските власти.
Володимир Зеленски изјави дека Русија од вчера лансирала повеќе од 1.560 дронови. Според украинските власти, во нападите загинале најмалку 11 лица.
Зеленски навел дека Москва во текот на ноќта испратила повеќе од 670 борбени дронови и 56 ракети, додека украинската противвоздушна одбрана соборила 41 ракета и 652 дрона.
„Ова сигурно не се постапки на оние што веруваат дека војната се приближува кон крајот“, изјавил Зеленски.
Тој додал дека е важно меѓународните партнери да не молчат за нападите и да продолжат со поддршката за украинската воздушна одбрана.
Според украинскиот претседател, најмалку пет лица загинале во Киев, додека уште шестмина биле убиени во вчерашните напади низ западниот дел на земјата.
Во Киев биле оштетени 20 локации, како и повеќе делови од Киевската област. Ранети се околу 40 лица, меѓу кои и две деца.
Еден дел од деветкатна станбена зграда целосно се урнал по удар на руски дрон. Министерот за внатрешни работи, Игор Клименко, изјавил дека повеќе од 10 лица сè уште се водат како исчезнати, додека спасувачките служби ги расчистуваат урнатините.
„Целата зграда се урна“, изјавила 74-годишната жителка Ала Комисарова.
Зеленски навел дека во цела Украина биле оштетени околу 180 објекти, меѓу кои повеќе од 50 станбени згради.
Руските напади предизвикале прекин на водоснабдувањето во Киев, а локалните власти вклучиле генератори за обновување на снабдувањето.
Во Харков биле ранети 28 лица, меѓу нив и три деца, по напади врз цивилна инфраструктура.
Украинското Министерство за енергетика соопштило дека снабдувањето со електрична енергија било нарушено во 11 региони, а мета на нападите биле и железничката и пристанишната инфраструктура во областа Одеса.
