Руски претставници најавија дека Москва ќе бара отштета од европските држави за војната во Украина, како и враќање на околу 300 милијарди долари руски средства што беа замрзнати на Запад по почетокот на инвазијата во 2022 година.
Алексеј Чепа, прв заменик-претседател на Комитетот за меѓународни работи во Државната дума, изјави дека Русија ќе го покренува ова прашање пред европските земји и оти, според него, тие треба да сносат одговорност за својата улога во конфликтот.
Сличен став изнесе и сенаторот Александар Волошин, кој смета дека западните земји треба да ја надоместат штетата во Донбас, како и во окупираните делови на Запорожје и Херсон и во руските погранични региони. Според проценките на шефот на рускиот Истражен комитет, Александар Бастрикин, штетата изнесува околу еден билион рубљи, односно приближно 10,8 милијарди евра.
Кремљ и натаму тврди дека Западот и НАТО се одговорни за ескалацијата на војната. Портпаролот на Кремљ, Дмитриј Песков, изјави дека конфликтот не би достигнал сегашни размери без воената и финансиската поддршка што Украина ја добива од западните сојузници.
Според податоците на Институтот за светска економија во Кил, САД од 2022 до јануари 2026 година испратиле околу 114,6 милијарди евра помош за Украина, додека европските земји обезбедиле околу 270 милијарди евра.
Во меѓувреме, руските сили продолжуваат со нападите врз Украина. Во најновите напади со беспилотни летала и балистички ракети беа погодени повеќе градови и цивилна инфраструктура. Во Киев беа предизвикани пожари во неколку населби, додека во Кривиј Рих беше погоден трговски центар. На Црното Море, руски беспилотни летала двапати нападнаа цивилен товарен брод кој превезувал пченка од пристаниште во Одеската област.
