Русија се враќа на фиксните телефони: Мобилниот интернет се исклучува, набавките зголемени трипати

Русија сè повеќе се враќаат на фиксните телефони поради честите прекини на мобилниот интернет, кои зафаќаат речиси 80 проценти од територијата на земјата. Државните компании и институции во првите осум месеци од годинава потрошиле трипати повеќе пари за набавка на фиксни телефонски апарати отколку во истиот период лани, обидувајќи се да обезбедат стабилна комуникација во услови на сè почести ограничувања на мобилните мрежи.

Според податоците од јавните набавки што ги објави рускиот деловен весник „Ведомости“, од јануари до август 2026 година за фиксни телефони биле потрошени 118 милиони рубли, односно околу 1,26 милиони евра. Истовремено, бројот на тендери за набавка на вакви уреди се зголемил за 12,5 проценти, пренесува „Еуроњуз“.

Најголем дел од набавките се однесуваат на големите деловни и инфраструктурни центри, каде што прекините на интернетот создаваат сериозни проблеми во секојдневното работење.

— реклама —

Претставници на телекомуникацискиот сектор за „Ведомости“ објасниле дека наглото зголемување на интересот за фиксните телефони е директно поврзано со ограничувањата на интернетот. Дополнителна причина е преминувањето на руските министерства и компании на домашни софтверски системи, процес што започна по повлекувањето на западните технолошки компании од рускиот пазар по инвазијата врз Украина во 2022 година.

Како причина за зголемената побарувачка се наведува и потребата од посигурни комуникациски канали, кои нема да зависат од достапноста на мобилниот интернет.

Руските власти почнаа систематски да го ограничуваат мобилниот интернет во мај 2025 година, кога услугите беа недостапни во повеќе од 40 региони во пресрет на одбележувањето на Денот на победата.

— реклама —

Она што првично изгледало како повремена безбедносна мерка постепено прераснало во редовна практика.

Според податоците на независен проект за следење на интернет-ограничувањата, во јуни 2025 година биле регистрирани 655 прекини на мобилниот интернет, додека во јули нивниот број се искачил на 2.099.

— реклама —

Аналитичарите посочуваат дека бројот на прекини регистрирани во Русија само во јули бил поголем од вкупниот број вакви инциденти забележани во светот во текот на целата претходна година.

Последиците од ограничувањата не се чувствуваат само во комуникацијата меѓу граѓаните. Прекините го отежнуваат функционирањето на банкарските услуги, такси-превозот, доставата на храна и навигациските системи. Проблемите се особено изразени во руралните средини, каде што пристапот до алтернативни интернет-мрежи е ограничен.

Руските власти ги оправдуваат исклучувањата со потребата од заштита од украински беспилотни летала. Според официјалното објаснување, мобилните мрежи можат да бидат користени за навигација и управување со дронови, па нивното привремено исклучување треба да ја намали опасноста од напади.

Сепак, дел од аналитичарите ја оспоруваат ефикасноста на ваквата мерка. Тие објаснуваат дека беспилотните летала можат да се движат по однапред програмирани маршрути и без постојана интернет-врска. Дополнително, ограничувањата се воведуваат и во региони што се значително оддалечени од фронтот во Украина.

Дека фиксните телефони повторно добиваат значење потврди и портпаролот на Кремљ, Дмитриј Песков. Во март, запрашан како ограничувањата на мобилниот интернет во центарот на Москва влијаат врз работата на кабинетот на рускиот претседател, тој одговорил дека претседателската администрација користи фиксни телефони.

Набргу потоа, директорот на државната телекомуникациска компанија „Ростелеком“, Михаил Осеевски, ги повика граѓаните повторно да размислат за корист