Руска нафтена компанија со ограничувања за гориво: На градските пумпи ќе се точат до 30 литри

Руската нафтена компанија „Росњефт“ воведува ограничувања за продажба на гориво на своите бензински пумпи во повеќе региони низ Русија, соопшти Министерството за економски развој на Забјакалскиот крај.

— реклама —

Според информациите на Министерството, на бензинските пумпи во градските подрачја ќе може да се купат најмногу 30 литри гориво, додека на пумпите лоцирани покрај автопатиштата ограничувањето ќе биде до 50 литри, пренесува порталот „Медуза“.

Ограничувања за испорака на бензин и дизел-гориво се воведени и на бензинските пумпи на „Росњефт“ во Краснојарск.

— реклама —

Компанијата вовела ограничувања и во Карелија, каде што, според соопштението на регионалниот гувернер Артур Парфенчиков, е забрането точење гориво во канистри.

— реклама —

Во изминатите месеци неколку руски рафинерии за нафта на „Росњефт“ беа цел на напади со украински беспилотни летала.

На крајот на октомври беше нападната рафинеријата „Новокујбишевск“ во Самарската област, а на 31 октомври мета беше рафинеријата „Башнефт-Новоил“ во Уфа. На 5 ноември беше нападната и рафинерија во Рјазањската област.

— реклама —

Според информациите на „Блумберг“, раководството на „Росњефт“ смета дека продолжувањето на војната со Украина уште неколку месеци може да предизвика долгорочна штета врз работењето на компанијата.