„Рускиот Гугл“ под удар на дронови, корисниците со проблеми во пристапот до податоците

Руската технолошка компанија „Јандекс“, позната и како „рускиот Гугл“, се соочува со сериозни прекини во работата на своите услуги откако напади со дронови оштетиле три нејзини клучни центри за податоци.

Компанијата целосно го прекинала работењето на два објекта во Сасово и Владимир, додека центарот во Калуга работи со значително намален капацитет. Корисници од различни делови на Русија пријавуваат проблеми со пристапот до датотеките и услугите зачувани на облачната инфраструктура на компанијата.

— реклама —

Од „Јандекс“ соопштиле дека во инцидентите нема повредени. Засега нема потврдени информации кој стои зад нападите, иако постојат сомневања за вмешаност на украинските сили.

— реклама —

„Јандекс“ нуди широк спектар услуги, меѓу кои пребарувач, навигација, превоз, достава на храна, интернет-продавница, електронска пошта и облачни решенија што ги користат приватни корисници и компании.

Прекините ги зафатија и услугите за складирање податоци, особено „Јандекс диск“, каде што корисниците пријавуваат грешки при преземање и обработка на датотеки. Дел од услугите, вклучително и програмските интерфејси и базите на податоци, остануваат делумно достапни, но со повремени проблеми во работењето.

— реклама —

Компанијата соопштила дека нејзините инженери непрекинато работат на стабилизирање на системите и помош за засегнатите корисници и партнери. Сепак, засега не може да даде сигурна процена кога услугите целосно ќе бидат обновени, поради што клиентите се повикани да користат алтернативни услуги и решенија за обновување податоци.

Сè уште не е познато дали оштетувањето на центрите за податоци предизвикало трајно губење на дел од зачуваните информации.

Инцидентот привлече внимание и во Европскиот парламент. Пратеникот Томаш Здеховски укажал на можна поврзаност меѓу прекините во мрежата на „Јандекс“ и ненадејното намалување на активноста и комуникацијата на профили во Германија што промовираат крајнодесничарски идеи.