Морскиот сообраќај низ Ормускиот теснец сѐ повеќе се пренасочува во иранските територијални води, преку „сигурен“ коридор кој Техеран го воспостави за проверка на бродовите и издавање дозволи за транзит, пишува во анализа специјализираната компанија Lloyd's List.
Техеран минатата недела најави „нов режим“ за минување низ теснецот со цел санкционирање на „сили кои стремат кон доминација“ преку блокада на нивните бродови, цитирајќи ги изјавите на советникот за економија на иранскиот врховен лидер Мојтаба Хаменеи, Мохамед Мокхбер.
Иран ја презеде контролата над Ормускиот теснец по американско-израелскиот напад на 28 февруари, забранувајќи транзит на бродови поврзани со САД, Израел и нивните сојузници.
Иранските власти воспоставија „сигурна“ рута низ своите територијални води, а наскоро ќе се утврди и службена постапка за издавање дозволи за бродовите во транзит, јави Lloyd's List.
Коридорот минува помеѓу островот Кешм покрај иранската обала и островот Ларак, каде иранската морнарица и пристанишната управа визуелно ги проверуваат бродовите, проверуваат податоци и наводно наплаќаат такси за транзит.
Досега, преку новиот коридор поминале повеќе од 20 бродови со корисна носивост над 10.000 тони. Меѓу нив бил и голем танкер Omega Trader со два милиони барели ирачка нафта, пренесува порталот OilPrice.
Иранскиот министер за надворешни работи Абас Аракчи повторно истакна дека Ормускиот теснец не е затворен и ги обвини САД за нарушувања во сообраќајот. Тој нагласи дека слободата на пловидба е невозможна без слобода на трговија и дека секој брод треба да ги почитува правилата за транзит.
Дозволите за транзит се разгледуваат индивидуално, а некои влади директно комуницираат со иранските власти за обезбедување сигурен премин, потврдува Lloyd's List.