САД наводно се повлекуваат од близина на Иран, Техеран ветува нормализација во Ормутскиот теснец

Ирански медиуми објавија неофицијална рамка за меморандум за разбирање меѓу Иран и САД, пренесе Скај њуз.

Според нацрт-договорот, американските воени сили би се повлекле од близина на Иран и би ја укинале поморската блокада на иранските пристаништа.

— реклама —

За возврат, Иран наводно се обврзал во рок од еден месец да го врати бројот на комерцијални транзитни бродови низ Ормутскиот теснец на нивото пред војната.

— реклама —

Во нацртот се наведува дека воените бродови не се опфатени со договорот.

Меѓу останатите точки во меморандумот, како што пренесуваат медиумите, се и:

— реклама —

– Управувањето и рутите на бродскиот сообраќај низ теснецот да бидат регулирани од Иран во соработка со Оман.
– Доколку конечен договор биде постигнат во рок од 60 дена, тој да биде потврден преку обврзувачка резолуција на Советот за безбедност на Обединетите нации.
– Рамката сè уште не е финализирана и Иран нема да преземе чекори без, како што се наведува, „опиплива верификација“.

Ормутскиот теснец е еден од најважните светски поморски правци за транспорт на нафта и гас, низ кој поминуваат околу 20 проценти од светската нафта и течен природен гас.

На почетокот на конфликтот со САД и Израел, Иран го блокираше Ормутскиот теснец, по што Вашингтон одговори со сопствена поморска блокада на регионот.